RITIMJOK SILROROE, A Tribute to Ma'chong Leaders.
Composed by Dr. J. W. Momin.
Background of the song:
Chengon Wa·tre ma·chong chonbegipa Wa·trepara
minggipa songosa songdong a·chaachim. Wa·trepara song Rajasimla-oni mile 6-mang
chel·ao dongachim. Uamangoni mitamrang Rajasimla songona katbaaha aro ua
biapona katonba·gipa nokdangonin A·chikrangni gisepo Kristian toromko bebera·chenge
a·chik jatni a·gilsakni gita mikandale janggi tang·aoniko seng·aona ra·baaha.
A·chik jatna Kristian toromko skie on·anichi gipatasan ong·aijaha indiba
songsal janggi tangani, lekka poraiani aro sea jotani kamrangkoba jatna on·aha.
Ia ma·chongoni jatko mikaoatna kam ka·dilgiparangara
Omed, Ramke, Rangku, Fokira, Reban, Ware, Dobaki, Ganme, Parbati, Tilakchand, Howard Denison, Kandura, Bronson iamangan
mongsonggiparang ong·achim. A·song chigako namdapatna silbatatna kam ka·na ine
a·chik a·songni dingtang dingtang biaprangchi Wa·tre Ma·chongonin Rajasimlaoni re·ongkatangtokaha.
Uamangoni Ramke aro Ware abisa Nisangram-o songdonge ua jolo songdonggipa
manderangna raken kam ka·aha. Dobaki aro Ganme Turaona re·bae skie on·anirangko dakaha
aro Rangku baksana uni namchiktang Parbati Baghmaraona re·ange salgipeng jolo
songdonggipa a·chikrangna kam ka·aha. Indake ma·chongni jelroroani a·chik
a·songo giproroangaha.
Ritimjok
silroroe,
Wa·tre
chong balpongbae;
Jelbrajok
a·o priprae,
A·bri
a·kong bimik nae;
Wa·tre [1]chong
ba ma·chong bang·pagijaoni gipin gipin a·chik a·songni biaprangonaba priprae
jelroroaha. Je biapo songdongoba, Wa·tre ma·chong silrorona man·aha. A·bri a·kong a·kawe pilak jolrangon ma·chongni giproroani sokangaha
aro A·chik ma·chongrangni gisepo mingsing minggamako man·batgiparangoni ma·sa
ong·aha.
Ma·chongan
a·chik [2]duramong,
Ong·jok
wa·trean [3]krong;
Ja·chongrikjok
na·mangan,
Jaktuatgija
nang’ jakan;
Ia ma·chongan A·chik jatko baditaba chasongrangna duramong
ong·e dilbaaha. Je wa·trerangkon krong gita jatko dilna songaha, uamang
mangrake pangkamgipaba ong·aha. Da·alonaba uamangni kamrango ja·chongrikani
bon·changja. Jeba jatko songsalko mondoliko aro mahariko dilchina, uamang
jaktuatgija kingkot ong·e kamrangko ka·e chu·sokata.
Teng·chakgen nang’ jagringan,
Ja·rikon nang’ ja·kuan;
Krimkro jakko snile,
Mangrakatgen chiripate;
Uamangni mingnama kamrang uamangon bon·aijawa,
indiba dedrang su·drangrangonan pilak indonga kamrang ja·chongrikgen. Indakgipa
ja·chongrikani kamrangko ka·na gita altubea ong·ja, indiba chu·sokatanina kamrangko
ku·mong nangrime an·tangtangni jakrangko snilate ka·na nanggen. Ku·monganiko on·e
saksa sakgipino ka·donggrikaniko on·e ma·chongni bilko mangrakatna nanggen.
Chorus
Oh, chingni mama ada atchu ambirang,
Mi·telbea
na·mangko chinga de-su·drangrang;
Jaksrambee
on·giljok, mangrakatna bakdilko,
Ku·mong
nangrimgrike, rikjok nokko;
An·ching an·chingni mama-ada atchu ambirangko
uamangni jaksrame jatko bilakatna ma·chongko niksengatna kamrangko ka·e
on·gilahanina mitelna gita krachongmota. Hai ma·chongni sakantian,
nokdangantian uamangni jaksrambee kamrangko ka·e on·gilanina mitelna. MITELA.
[1] Chong
- Wa·tre-ni jelaniko chong·sa ba chong·gni ine talata.
[3] Krong
– Je manderangran songsalko aro mondoliko dilgipani bakko man·a, uamangkon
KRONG ine agana.
